1Ki 7 | NdeIBE | STEP | Kwathatha uSolomoni iminyaka elitshumi lantathu ukuqeda ukwakha isigodlo sakhe.

1 Kings 7

USolomoni Wakha Isigodlo Sakhe

1 Kwathatha uSolomoni iminyaka elitshumi lantathu ukuqeda ukwakha isigodlo sakhe.

2 Wakha isiGodlo seGusu leLebhanoni saba side okwezingalo ezilikhulu, lamatshumi amahlanu ububanzi lamatshumi amathathu ukuya phezulu, sakhelwe phezu kwezinsika zemisedari eziyimizila emine, kulamapulanka omsedari phezu kwayo. 3 Sasifulelwe ngamapulanka omsedari ayephezu kwezinsika ezingamatshumi amane lanhlanu, ziyimizila emithathu, umzila ulezinsika ezilitshumi lanhlanu. 4 Kwakulemizila emithathu yamawindi, ayeqondene. 5 Yonke iminyango yayimiswe yaba magumbi mane; yayimiswe ngaphambili ngamithathu, ikhangelene.

6 Wasesakha lendlu yezinsika, ubude bayo buzingalo ezingatshumi amahlanu, ububanzi bayo bungezingamatshumi amathathu. Phambi kwayo kulekhulusi elilezinsika phambili, lophahla.

7 Wasesakha lendlu yesihlalo sobukhosi, iNkundla Yokwahlulela, lapho ayezathonisela khona amacala, wayendlala ngemisedari kusukela phansi kusiya ephahleni. 8 Indlu yakhe ayezahlala kuyo yayisegumeni elingemuva kwendlu yokuthonisela amacala, yayakhiwe ngokufananayo. USolomoni wakhela indodakazai kaFaro ayeyithethe, isigodlo esifanana lendlu yenkundla.

9 Zonke lezizakhiwo, kusukela ngaphandle kuze kuyefika egumeni elikhulu phakathi kanye lokusuka esisekelweni kusiya esihlothini, zazakhiwe ngamatshe aqakathekileyo ayebazwe ngesilinganiso esahiwe kuhle ngaphakathi langaphandle kwawo. 10 Izisekelo zakhiwa ngamatshe amakhulu aqinileyo, amanye ayezingalo ezilitshumi amanye njalo zificamibili.

11 Ngaphezulu kwakulamatshe aqinileyo, ebazwe ngesilinganiso, kanye lemijabo yomsedari.

12 Iguma elikhulu lalibiyelwe ngomduli wemithando emithathu yamatshe yelekene kanye lalowomsedari obazwe kuhle, kanti kwakunjalo lasegumeni lethempeli likaJehova lekhulusini lakhona.

Imiceciso yeThempeli

13 INkosi uSolomoni yathumela eThire ukuba kulethwe uHuramu. 14 Unina wayengumfelokazi owesizwe sako-Nafthali ezalwa yindoda eyayingeyeThire njalo eyayiyingcitshi ekubazeni ithusi. UHuramu wayelobuciko lemimwe ekubazeni ithusi. Waya enkosini uSolomoni wafika wenza yonke imisebenzi ayeyiphiwe.

15 Wabumba izinsika ezimbili zethusi ezazinde okwezingalo ezifica mibili ukuya phezulu njalo ubundingilizi bazo zazizingalo ezilitshumi lambili ngomzila. 16 Wabumba njalo iziduku ezimbili zethusi ukuze zifakwe engqongeni yezinsika zona ezazizingalo ezinhlanu ukuya phezulu inye ngayinye.

17 Isixubexube samaketane ayephothene sacecisa iziduku ezaziphezu kwezinsika eziyisikhombisa esidukwini sinye ngasinye.

18 Wenza imizila emibili yomceciso wamaphomegranathi, igqagqele lesosixubexube ukucecisa iziduku phezu kwezinsika. Wenza okufanayo kusiduku ngasinye. 19 Iziduku ezaziphezu kwezinsika ekhulusini zazibunjwe okwemiduze, ziphakeme okwezingalo ezine. 20 Phezu kweziduku ezinsikeni zombili, ngaphezu kwesigaba esiyingubhe phansi kwesixubexube, kungamaphomegranethi angamakhulu amabili emizileni nxa zonke. 21 Wakha lezozinsika ekhulusini lethempeli. Insika eseningizimu wayibiza ngokuthi nguJakhini kwathi esenyakatho wayithi nguBhowazi. 22 Iziduku ezaziphezulu zazibunjwe okwemiduze. Wapheleliswa kanjalo umsebenzi wezinsika.

23 Wasesenza uLwandle ngensimbi encibilikisiweyo, luyisigombolozi, luyizingalo ezilitshumi ukusuka emphethweni kusiya emphethweni luphakeme okwezingalo ezinhlanu. Ukulinganisa leyondingilizi kwakuthatha intambo ezingalo ezingamatshumi amathathu ukuyizingelezela. 24 Ngaphansi komphetho, kungamaqhagana agqagqeleyo – elitshumi engalweni eyodwa. Amaqhagana la ayebunjwe aba yimizila emibili ensimbininye loLwandle.

25 ULwandle lwalumi phezu kwezinkunzi ezilitshumi lambili, ezintathu zikhangele enyakatho, ezintathu zikhangele entshonalanga, ezintathu zikhangele eningizimu kuthi ezintathu zikhangele empumalanga. ULwandle lwalugxile phezu kwazo, imilenze yazo igobele phakathi.

26 Uhlonzi lwalulingana ububanzi besandla, umphetho ufanana lomphetho wenkomitsho, kufanana lokuqhakaza kweluba. Lwalungena izikhelelo ezizinkulungwane ezimbili.

27 Wenza njalo amathala ethusi alitshumi aphakamisekayo ubude bawo buzingalo ezine, lobubanzi buzingalo ezine, ukuphakama kuzingalo ezintathu lilinye. 28 Amathala ayenziwe ngalindlela: Kwakulezisekelo eziya phezulu emaceleni zinanyathiselwe.

29 Kulezozisekelo phakathi kwezinsika eziya phezulu kubunjelwe izilwane, izinkunzi lamakherubhi – kuthi kulezonsika eziya phezulu kufanane njalo. Ngaphezulu langaphansi kwezilwane lezinkunzi kulezinkatha ezikhandiweyo. 30 Inqodlana nganye ilamavili lama-ekseli ethusi, njalo nganye ilomganu phezu kwezinsika ziceciswe ngemithando ekhandelwe nxa zonke. 31 Ngaphakathi kwenqodlana yinye nganye kuvulekile kuyisigombolozi esitshona okwengalo eyodwa. Isikhala lesi siyisigombolozi ngaphansi kwaso siyingalo elengxenye. Emlonyeni kukhona okwabazelwayo kungumceciso. Okubaziweyo emaceleni kulingana nxa zonke zone, kungayisiyo indingilizi. 32 Amavili womane engaphansi kwamapulanka, lama-ekseli amavili ebotshelwe enqodlaneni. Ububanzi bendingilizi yevili ngalinye bulingana ingalo eyodwa elengxenye. 33 Amavili akhona enziwe njengawenqola yempi, ama-ekseli, amarimu, lezipekisi lengoxo zakhona zingezensimbi etshisiweyo.

34 Inqodlana nganye yayilezibambo ezine, esisodwa sisegumbini linye, sigxile enqodlaneni. 35 Phezu kwenqodlana kulomthando oyisizingelezi esitshona okwengxenye yengalo. Izisekelo lamapulanka kuxhume phezu kwenqodlana. 36 Wabazela khona amakherubhi, izilwane kanye lezihlahla zamalala kuyo yonke indawo ebonakalayo lomceciso nxa zonke. 37 Yiyo-ke le indlela ayenze ngayo izinqodlana ezilitshumi. Zazenziwe ngomkhando munye zilingana ubukhulu zilesimo sinye.

38 Wasebumba imiganu elitshumi ngethusi, umunye uthatha izikhelelo ezingamatshumi amane ububanzi bayo buzingalo ezine, kusithi umganu owodwa ubekwa phezu kwenqodlana nganye yezilitshumi. 39 Wasemisa inqodlana ezinhlanu zazo ngeningizimu yethempeli kwathi ezinhlanu zema enyakatho. ULwandle walubeka eningizimu, ejikweni laseningizimu yempumalanga kwethempeli. 40 Wabumba njalo imiganu lamafotsholo lemiganu yesichelo. Ngalokho uHuramu wawuphetha umsebenzi ayewenzela iNkosi uSolomoni ethempelini likaJehova:

41 Izinsika ezimbili; iziduku ezimbili ezibunjwe okomganu phezu kwezinsika; izixubexube ezimbili ezicecise iziduku ezimbili eziyingubhe eziphezu kwezinsika;

42 amaphomegranethi angamakhulu amane awezixubexube ezimbili (isixubexube sisinye silemizila emibili yamaphomegranethi, acecise iziduku ezizingubhe eziphezu kwezinsika);

43 izinqodlana ezilitshumi lemiganu yazo elitshumi;

44 uLwandle lezinkunzi ezilitshumi lambili ngaphansi kwalo;

45 izimbiza, amafotsholo lemiganu yesichelo. Zonke lezizinto ezenzelwa iNkosi uSolomoni nguHuramu ezenzela ithempeli likaJehova zazenziwe ngethusi elihanguliweyo. 46 Inkosi yalungiselela ukuthi zonke zibunjwe ngesithombo somdaka emagcekeni aseJodani phakathi kwaseSukhothi laseZarethani.

47 USolomoni wayekela konke lokhu kungalinganiswanga isisindo sakho, ngenxa yokuthi kwakukunengi kakhulu; ubunzima bensimbi yethusi bungazanga bulinganiswe.

48 USolomoni wenza yonke imiceciso eyayisethempelini likaJehova: i-alithare eliligolide; itafula eliligolide lilesinkwa sobukhona bukaNkulunkulu;

49 izinti zezibane zegolide elicengekileyo (ezinhlanu zazo ngakwesokudla njalo zinhlanu langakwesenxele, phambi kwesiphephelo esingaphakathi); okubalazwe ngamaluba, izibane kanye lezindlawu;

50 imiganu yegolide elicengekileyo, izibane, imiganu yokuchelisa, izinditshi leyempepha; kanye lezibambo zezivalo zingezegolide ezazenzelwe indlu engaphakathi, indawo eNgcwele Ngcwele, kanti-ke kwakunjalo lezivalweni zendlu enkulu phakathi kwethempeli.

51 Kwathi usuphelile wonke umsebenzi owawenziwe yinkosi uSolomoni ekwakheni kwakhe ithempeli likaJehova, waletha lezompahla ezazinikelwe nguyise uDavida – isiliva legolide layo yonke imiceciso – konke lokhu wakufaka endlini yenotho ethempelini likaJehova.